mi seme?

lipu ni li pini ala

mi seme?

ijo lili

• nimi: jan Awa (toki pona) / Ava (English) / 벼리 (한국어, 실명 아님)
• tenpo sike: LLTW
• ni li pona nanpa wan tawa mi: toki pona, sona toki, toki pali
• ni li pona nanpa tu tawa mi: sona nanpa, sona jan, pali pi toki musi, pali pi ma musi
• nasin musi: lukin pi lipu Wiki, sitelen, pali ma
• toki kepeken: 한국어, English, toki pona
• toki pi sona lili: toki Epelanto, toki Sonko (tenpo pini la mi lon ma Sonko li ken toki pona. tenpo ni la sona mi li weka)

lipu ni li seme?

tan seme la mi pali e lipu ni?

mi wile sitelen e pilin mi e pali mi tan ijo ni: nanpa wan la, ni li pona tawa pilin mi. nanpa tu la, mi ken kama sona e ni: mi pali e seme? seme la mi ken pona e pali mi? nanpa mute la, tenpo kama la mi ken kepeken e ni tawa ijo mute. mi wile lon kulupu sona anu kulupu pali la, keeeen la mi ken kepeken e ni (mi sona e ni: ni li nasa. taso keeeeeen la a a a)

kin la, tenpo ni la ilo AI li lon. ilo li ken pana e ijo pi nasa ala. taso ona li jo ala e pilin e tenpo pini e nasa. jan taso li jo e ona. (ken la tenpo kama la ilo li jo e pilin, taso tenpo ni en tenpo kama poka la ona li jo ala) tan ni la mi wile pana e pilin e pali e nasa.

mi wile e seme lon lipu ni?

lipu ni li tawa jan seme?

MI SONA ALA A

lipu ni li tawa mi tan ni: mi sitelen e ijo lon lawa mi la ijo li kama suli la mi ken pali mute kepeken ona. mi ken lukin e ona lon tenpo kama li sona e ni: mi seme lon tenpo pini? ken la mi pi tenpo kama li ken kepeken e ni.

lipu ni li tawa jan poka mi tan ni: wile mi la jan poka li lukin e lipu mi li kama sona e pilin mi e pali mi la ona li ken sona e mi li ken pana e pona tawa pilin mi.

lipu ni li tawa jan ante pi sona mi ala tan ni: keeeeeen la jan ante li ken lukin e lipu mi. ni la ona li ken pana e ni tawa mi: seme la ijo lon lawa mi li pona li ike? ken la ona li kama sona tan pilin mi tan pali mi. pilin mi la jan li ken kama sona ala tan ijo mi, taso ni li ken.